VIFR2FF05 - Viðskiptafræði - Fjármálafræði

Lýsing

Kennsla áfangans byggist á fyrirlestrum þar sem farið er yfir megin aðferðarfræði fjármálastjórnunar. Farið er í fjármálaútreikninga og dæmi í Excel. Nemendur vinna einstaklings- og hópverkefni heima og í tímum.

Niðurstöður hópverkefna kynna nemendur fyrir öðrum. Fjallað er um fjármál einstaklinga og helstu hugtök á sviði fjármála almennt, s.s. sparnaðarleiðir, fjárhagsáætlanir, vexti, verðtryggingu, ávöxtunarkröfu, skuldabréf, hlutabréf, greiðsluraðir, vísitölur og gengi. Áhersla er lögð á þjálfun í útreikningum. Fjallað er um markað fyrir helstu tegundir verðbréfa og meginatriði er varða mat á margvíslegum fjárfestingarkostum.

Nemendur nota Meniga við lausn verkefna við gerð fjárhagsbókhalds auk almenna notkun reiknivéla á heimasíðum banka.

Nemandi skal hafa öðlast þekkingu og skilning á:

• helstu réttindum og skyldum launþega og verktaka
• almennum sparnaði, lífeyrisréttindum og viðbótarlífeyrissparnaði
• ýmsum skattgreiðslum og skatttekjum og útgjöldum hins opinbera
• hvað kostar að vera unglingur í dag, reka bíl og hvað þarf að huga að við kaup á eignum
• gengi gjaldmiðla, verðbólgu og hvernig verðbólga myndast og er mæld

Nemandi skal hafa öðlast leikni í að:

• reikna prósentur og fjármálaföll
• reikna álagningu, virðisaukaskatt og afslætti á vörum, afborganir, nafnvexti, raunvexti og verðbætur af lánum og gengismun erlendra gjaldmiðla
• færa almennt heimilisbókhald
• setja upp launaseðil og gera útreikninga þar að lútandi, svo sem lífeyrissjóð og staðgreiðslu skatta

Nemandi skal geta hagnýtt þá þekkingu og leikni sem hann hefur aflað sér til að:

• geta lesið, greint, stjórnað og fjallað um fjárhagslega þætti sem hafa áhrif á efnahagslega velferð einstaklinga
• setja sér markmið í fjármálum og skoða hvernig tekst að ná þeim
• afla sér frekari þekkingar um fjármál og geta nýtt sér upplýsingatækni og netið við öflun upplýsinga og lausn verkefna sem tengjast fjármálaviðfangsefnum
• hafa yfirsýn og stjórn á daglegum fjármálum með einfaldri áætlanagerð

Grunnþættir menntunar

Í þessum áfanga nýta nemendur sér læsi til að öðlast hæfni til að skynja og skilja umhverfi sitt og samfélag á gagnrýninn hátt og taka þátt í að móta það. Nemendur eru virkir þátttakendur í að skapa eigin merkingu og bregðast á persónulegan og skapandi hátt við því sem þeir lesa með hjálp þeirra miðla og tækni sem völ er á. Þeir nýta sér til gagns tölulegar upplýsingar og nota og miðlað upplýsingum á gagnrýninn og skapandi hátt. Í áfanganum birtist heilbrigði og velferð með því að kennari hugi eftir bestu getu að félagslegri vellíðan nemenda með því að tryggja góð samskipti og öryggi innan hópsins. Í áfanganum er lýðræði haft að leiðarljósi og borin er virðing fyrir manngildium hvers og eins og tekið er tillit til áhuga nemenda og ábyrgðar þeirra á eigin námi. Nemendur eru hvattir til að láta sínar skoðanir í ljós og tekur kennari tillit til og hlustar á. Unnið er að því að skapa tækifæri fyrir alla til að þroskast á eigin forsendum, rækta hæfileika sína og lifa ábyrgu lífi í frjálsu samfélagi í anda skilnings, friðar, umburðarlyndis, víðsýnis og jafnréttis. Sköpun er tekin fyrir en lögð eru fyrir verkefni sem byggja á gagnrýninni hugsun nemenda með aðferðum sem opna sífellt nýja möguleika, mótun viðhorfa, gildismats og hæfni. Nemendur hafa tækifæri til að hafa áhrif á skólastarfið s.s. með skipulag og námsmat.