VGRT1GA03 - Verktækni rafiðna 1

Lýsing

Nemendur læri grunnatriði við smíði rafeindarása. Fá upplýsingar um efnisfræði íhluta rafeindatækninnar og virkni þeirra. Nemendur læra að beita helstu verkfærum eins og lóðbolta, tinsugu, bítara, járnsög, klippum, skrúfjárni og skiptilykli. Nemendur smíði einfaldar rafeindarásir og fái þjálfun í beitingu verkfæra. Nemendur geri mælingar á rásinni til að styrkja hæfni til mælinga á spennu, viðnámi og straumi í tengslum við rafmagnsfræði.

Nemandi skal hafa öðlast þekkingu og skilning á:

• virkni lóðbolta og mikilvægi hitastigs
• efnisfræði íhluta
• leiðni mismunandi efna
• myndun tæringar og spennu milli efna
• hvernig meðhöndla skal verkfæri
• hvernig meðhöndla skal AVO mæla
• helstu gerðum prentplatna
• helstu atriðum varðandi öryggi

Nemandi skal hafa öðlast leikni í að:

• stilla og hreinsa lóðbolta
• lóða rafeindarás án kaldra lóðninga
• nota tinsugu eða tinhreinsivír
• bora með fjölhraða borvél
• beygja og fella íhluti í prent svo vel fari

Nemandi skal geta hagnýtt þá almennu þekkingu og leikni sem hann hefur aflað sér til að:

• setja upp einfalda rafeindarás á blaði
• snúa rásinni yfir á veró borð
• rjúfa og tengja þar sem við á
• lóða íhluti án kaldra lóðninga
• lóða íhluti með hámarks leiðni
• losa íhluti upp án þess að skemma þá
• prófa rásina með AVO mæli
• bilanagreina ef rásin virkar ekki

Grunnþættir menntunar

Í þessum áfanga er unnið markvisst að því að efla faglæsi nemenda á táknkerfi, teikningar og tæknilegar upplýsingar. Lögð er rík áhersla á sköpun og lausnamiðaða hugsun þar sem nemendur hagnýta þekkingu sína í raunhæfum verkefnum. Sjálfbærni og fagleg vinnubrögð eru fléttuð inn í námið með áherslu á skynsamlega nýtingu efnis og varanlegar lausnir. Öryggi er ætíð í forgrunni til að tryggja heilbrigði og velferð í vinnuumhverfinu. Lýðræði og mannréttindi birtast í því að ríkt samráð er haft við nemendur; þeim er tryggt rými til að veita ábendingar, eiga uppbyggilegt samtal við kennara um tímasetningar á verkefnum og prófum. Loks er jafnrétti lagt til grundvallar í öllu starfi, þar sem öllum eru tryggð jöfn tækifæri til að dafna og eflast sem fagaðilar í hvetjandi námsumhverfi.