MATR1AM03 - Matreiðsla - Almenn matreiðsla

Lýsing

Áhersla er lögð á fjölbreyttar uppskriftir, bæði íslenskar og erlendar. Nemendur kynnast mismunandi matreiðslu- og bakstursaðferðum. Nemendur læra um meðferð matvæla, nýtingu þeirra og frágang. Einnig er meðhöndlun helstu tækja og eldhúsáhalda hluti af náminu. Nemendur læra einnig að bera fram mat, leggja á borð og ganga frá eftir borðhaldið. Nemendur tileinka sér hreint vinnuumhverfi og þurfa að þrífa vel eftir sig. Farið verður yfir næringargildi fæðunnar ásamt umræðum um kostnað heimilisuppihalds.  

Nemandi skal hafa öðlast þekkingu og skilning á:

• einföldum bakstri og matreiðsluaðferðum
• meðferð matvæla
• eldhúsáhöldum og tækjum í eldhúsinu
• góðu hráefni og hagkvæmni í innkaupum
• uppskriftum
• mikilvægi hreinlætis
• matarmenningu annarra þjóða

Nemandi skal hafa öðlast leikni í að:

• nota einfaldar matreiðsluaðferðir
• vinna rétt eftir uppskrift
• meðhöndla hráefni eftir mismunandi aðferðum
• þekkja innihald hráefna og geta valið hollari kostinn
• leggja á borð og ganga frá eftir borðhald
• ganga frá og þrífa vinnuaðstöðu
• viðhafa persónulegt hreinlæti við matargerð

Nemandi skal geta hagnýtt þá þekkingu og leikni sem hann hefur aflað sér til að:

• matreiða fjölbreytta rétti
• þekkja næringarefnin og nýta sér þau til vaxtar og viðhalds
• nota algengustu eldhúsáhöld og tæki
• meðhöndla matvæli rétt
• bera virðingu fyrir hráefninu og vinnuumhverfinu
• sýna samvinnu, tillitssemi og stundvísi

Grunnþættir menntunar

Læsi í matreiðslu felur í sér að nemendur læri að lesa í uppskriftir, hráefni, næringargildi og matargerðarferli. Þeir þjálfast í að skilja fagleg vinnubrögð í eldhúsi og nota fjölbreyttar aðferðir við matreiðslu. Nemendur þróa hæfni til að miðla og framkvæma hugmyndir sínar á skapandi hátt í matargerð.

Sjálfbærni í matreiðslu snýst um að nemendur læri að velja hráefni á ábyrgan hátt og draga úr matarsóun. Áhersla er lögð á nýtingu, endurnýtingu og umhverfisvæna matargerð. Nemendur kynnast mikilvægi þess að taka upplýstar ákvarðanir um neyslu og áhrif matar á umhverfi og samfélag.

Heilbrigði og velferð felur í sér að nemendur læri um hollan mat, næringu og öryggi í eldhúsi. Lögð er áhersla á hreinlæti, góða líkamsbeitingu og örugga vinnuhætti. Nemendur þróa skilning í tengslum við mataræði, heilsu og vellíðan.

Lýðræði og mannréttindi í matreiðslu felast í samvinnu, virðingu fyrir ólíkum hugmyndum og ábyrgð í hópvinnu. Nemendur læra að taka þátt í sameiginlegum ákvörðunum og virða fjölbreytileika í matarvenjum og menningu.

Jafnrétti snýst um að allir nemendur hafi jöfn tækifæri til að læra í matreiðslu óháð kyni, bakgrunni eða stöðu. Lögð er áhersla á fjölbreytileika í matarhefðum og að allir fái að tjá sig og læra á eigin forsendum.

Sköpun í matreiðslu felur í sér að nemendur þrói hugmyndir og lausnir í matargerð með frumleika og virkja sköpunargleði. Þeir vinna með hráefni á skapandi hátt, læra af mistökum og þróa eigin stíl í eldhúsinu frá hugmynd að fullunninni máltíð.