HAGF2RH05 - Hagfræði - Rekstrarhagfræði 1

Undanfari : Enginn
Í boði : Alltaf

Lýsing

Kennslan er byggð á fyrirlestrum, umræðum og dæmatímum. Lögð er áhersla á útreikning dæma og túlkun niðurstöðu þeirra, gerð grafa og greiningu þeirra. Einnig að nemendur tileinki sér sjálfstæð vinnubrögð og færni til að setja fram eigin niðurstöður á læsilegan hátt. Lögð er áhersla á að nemendur fylgist með eigin námsframvindu og beri ábyrgð á henni. Í áfanganum er farið í grunnatriði rekstrarhagfræðinnar og nemendur læra um hugtök eins og teygni, birgðastýringu, framleiðslu, kostnað, mismunandi markaðsform, verðaðgreiningu o.s.frv. Lögð er áhersla á að nemendur læri um mikilvægi skilvirkni í framleiðslu og rekstri fyrirtækja ásamt því að setja niðurstöður sínar skýrt fram.

Nemandi skal hafa öðlast þekkingu og skilning á:

  • hlutverki líkanasmíði í hagfræði
  • teygnihugtakinu almennt og helstu tegundum teygni
  • framleiðslu og afkastalögmálinu
  • kostnaðargreiningu og mismunandi kostnaðarhugtökum
  • mismunandi markaðsformum: einokun, fákeppni, einkasölusamkeppni, verðleiðsögn, fullkomin samkeppni

Nemandi skal hafa öðlast leikni í að:

  • fást við teygniútreikninga og túlkun þeirra
  • reikna dæmi tengd framleiðsluútreikningum og birgðahaldi
  • reikna 0-punkta, lágmarksverð til skamms- og langs tíma fyrir stöðvun/lokun fyritækis
  • reikna hagkvæmasta verð og magn miðað við mismunandi markaðsform, markaðsaðstæður og kostnaðarskipan
  • reikna og sýna fram á hvernig auka má hagnað fyrirtækis með verðaðgreiningu
  • nota diffrun, þegar við á, við lausn hámörkunar- og lágmörkunarvandamála

Nemandi skal geta hagnýtt þá þekkingu og leikni sem hann hefur aflað sér til að:

  • greina á hvaða markaði tiltekið fyrirtæki starfar og geti metið þau markaðsöfl, leikreglur og samkeppni sem skýra verðstefnu og hegðun þess á markaði
  • túlka og greina, á gagnrýninn hátt, niðurstöður rekstrarhagfræðilegra útreikninga
  • meta hvenær fyrirtæki á að beita verðaðgreiningu og hvað býr að baki verðstefnunni
  • nota stærðfræði og upplýsingatækni við lausn hagfræðilegra viðfangsefna
  • taka þátt í hópavinnu við úrlausn rekstrarhagfræðilegra vandamála á gagnrýninn og jákvæðan hátt

Grunnþættir menntunar

Í áfanganum er lögð áhersla á umhverfi, ábyrgð, virðingu og lýðræðislega vinnubrögð þar sem þeim takmörkunum sem viskerfi jarðar setur manninum, skynsamlega nýtingu auðlinda og sanngjarni skiptingu þeirra. Þannig er mikilvægt að efnahagsvöxtur byggi hvorki á, né leiði til, óhóflegs ágangs á náttúruna. Ungmenni takast á í námi sínu á við margvísleg álitamál og ágreiningsefni til að auka skilning á eigin vistspori, vistspori samfélaga og þjóða sem stuðlar að sjálfbærri þróun og hófsemi. Nemendur eru virkir þátttakendur í að skapa eigin merkingu og bregðast á persónulegan og skapandi hátt við því sem þeir lesa með hjálp þeirra miðla og tækni sem völ er á. Þeir nýta sér til gagns tölulegar upplýsingar og nota og miðlað upplýsingum á gagnrýninn og skapandi hátt. Í áfanganum birtist heilbrigði og velferð með því að kennari hugi eftir bestu getu að félagslegri vellíðan nemenda með því að tryggja góð samskipti og öryggi innan hópsins. Í áfanganum er lýðræði haft að leiðarljósi og borin er virðing fyrir manngildium hvers og eins og tekið er tillit til áhuga nemenda og ábyrgðar þeirra á eigin námi. Nemendur eru hvattir til að láta sínar skoðanir í ljós og tekur kennari tillit til og hlustar á. Unnið er að því að skapa tækifæri fyrir alla til að þroskast á eigin forsendum, rækta hæfileika sína og lifa ábyrgu lífi í frjálsu samfélagi í anda skilnings, friðar, umburðarlyndis, víðsýnis og jafnréttis. Sköpun er tekin fyrir en lögð eru fyrir verkefni sem byggja á gagnrýninni hugsun nemenda með aðferðum sem opna sífellt nýja möguleika, mótun viðhorfa, gildismats og hæfni. Nemendur hafa tækifæri til að hafa áhrif á skólastarfið s.s. með skipulag og námsmat.