VFOR3LO05 - Vefforritun - Vefforritun 4

Lýsing

Farið er nánar í hlutbundna forritun og nemendur vinna lokaverkefni þar sem byggt er á þekkingu frá fyrri áföngum. Nemendur búa til vefsíðu frá grunni eða með notkun ramma (e. frameworks). Nemendur læra að nota hluti sem hjálpa til við uppsetningu og viðhald gagnagrunna fyrir vefsíðu ásamt því að kynnast að senda gögn í rauntíma til notenda.

Nemandi skal hafa öðlast þekkingu og skilning á:

• aðferðafræði við skipulagningu á hugbúnaðarverkefni
• forritunarsöfnum
• hlutbundinni forritun

Nemandi skal hafa öðlast leikni í að:

• skrifa skipulagsskýrslu fyrir hugbúnaðarverkefni
• vinna hugbúnaðarverkefni í sprettum út frá skipulagi
• hanna alla hluti vefsíðu í viðeigandi forriti
• forrita vefsíðu út frá hönnun

Nemandi skal geta hagnýtt þá þekkingu og leikni sem hann hefur aflað sér til að:

• setja upp skipulag til að skipuleggja uppsetningu og útfærslu á stærra forritunarverkefni
• búa til vefsíðu með notkun servers, gagnagrunns og forrits
• búa til vefsíðu með Javascript ramma (e. framework) sem tengist við server, gagnagrunni og forriti

Grunnþættir menntunar

Í vefforritun er unnið með læsi með áherslu á stafrænt læsi og hæfni nemenda til að lesa, skilja og skrifa kóða fyrir vefinn. Nemendur þjálfast í að vinna með tæknilegar upplýsingar, leiðbeiningar, villuboð og gögn við þróun veflausna. Sjálfbærni tengist ábyrgri og skilvirkri notkun tækni til að þróa stafrænar lausnir sem geta einfaldað ferla, bætt aðgengi að upplýsingum og nýst samfélaginu.

Í tengslum við lýðræði og mannréttindi er lögð áhersla á ábyrgð, samvinnu, virðingu fyrir hugverkum og að veflausnir taki mið af ólíkum þörfum notenda. Jafnrétti birtist í því að nemendur læra að hanna aðgengilegar og notendavænar lausnir fyrir fjölbreyttan hóp notenda. Sköpun birtist í hönnun og þróun eigin veflausna þar sem nemendur prófa útfærslur, leysa vandamál og endurbæta verkefni sín.