TÖTÆ1GR05 - Tölvutækni 1

Lýsing

Í áfanganum kynnast nemendur virkni undirstöðueininga einkatölvu svo sem örgjörva, rásasetti, tengiraufum, minni, einstökum stýringum á móðurborði, diskastýringum og inn og úttakstengjum. Fjallað er um tækniupplýsingar og val á tæknibúnaði í samræmi við þær. Áhersla er lögð á að nemendur fái innsýn í samvirkni helstu jaðartækja sem notuð eru með einkatölvum. Nemendur vinna ýmis verkleg og bókleg verkefni til að ná þessari þekkingu.

Mikilvægi net- og upplýsingaöryggis er kynnt fyrir nemendum, bæði ógnum og vörnum við þeim.

Í lok áfangans eiga nemendur að kunna skil á helstu einingum tölvunnar, samskiptum þeirra innbyrðis og við jaðartæki, vera fær um að koma fyrir, tengja og setja upp algengan búnað í tölvu auk þess að tengja og setja upp jaðartæki. Nemendur læra um mikilvægi varna gegn ytri og innri ógnunum og að geta meðhöndlað íhluti tölvunnar á réttan hátt.

Nemandi skal hafa öðlast þekkingu og skilning á:

• virkni undirstöðueininga s.s. örgjörva, rásasetta, tengiraufa, minnis, einstakar stýringar á móðurborði, hlutverk BIOS, diskastýringar, inn- og úttakstengi 
• mismunandi jaðartækjum sem tengjast við tölvur 
• áhrifum stöðurafmagns og spennutruflana á tölvuíhluti
• talnakerfum og rökrásum
• vörnum gegn stöðurafmagni og spennutruflunum 
• helstu net- og upplýsingaöryggisógnum
• aðferðum til að verjast öryggisógnum

Nemandi skal hafa öðlast leikni í að:

• færa tölur á milli talnakerfa
• teikna upp einfaldar rökrásir
• skilja einfaldar rökrásamyndir
• taka í sundur og setja saman fartölvur
• höndla ýmis handverkfæri

Nemandi skal geta hagnýtt þá þekkingu og leikni sem hann hefur aflað sér til að:

• skilja tengingar og uppbyggingu vélbúnaðar í tölvu
• velja rétta íhluti og skipta um þá.
• útbúið sannleikstöflur rökrása
• skilja ýmsar tegundir net- og upplýsingaógna

Grunnþættir menntunar

Í áfanganum koma grunnþættir menntunar einkum fram í gegnum læsi, sjálfbærni og lýðræði.

Læsi er hér í víðum skilningi og snýr sérstaklega að tæknilæsi og upplýsingalæsi – nemendur læra að lesa úr tækniupplýsingum vél- og hugbúnaðar, túlka tækniforskriftir, vinna með talnakerfi og rökrásir, og afla sér upplýsinga úr fjölbreyttum tæknigögnum. Þetta gerir þeim kleift að bregðast gagnrýnið við þeim upplýsingum sem þeir mæta í tæknivæddu samfélagi. Sérstaklega skiptir miklu máli sá hluti áfangans sem fjallar um net- og upplýsingaöryggi, þar sem nemendur læra að þekkja ógnir, beita gagnrýnu mati á upplýsingar og átta sig á ábyrgð sinni sem notenda í stafrænum heimi.

Sjálfbærni kemur fram í umfjöllun um tölvuíhluti, lífsferil þeirra og endurvinnslu. Nemendur íhuga áhrif tækninnar á umhverfið – hvernig framleiðsla, notkun og förgun raftækja tengist vistspori einstaklinga og samfélaga – og hvers vegna skynsamlegt val á íhlutum og rétt meðhöndlun búnaðar skiptir máli fyrir sjálfbæra þróun.

Heilbrigði og velferð kemur óbeint inn í gegnum umræðu um net- og upplýsingaöryggi, sem snertir andlega líðan, einkalíf og öryggi á netinu.

Lýðræði og mannréttindi birtast í áherslunni á upplýsta og ábyrga borgara í tæknivæddu samfélagi þar sem þekking á öryggismálum er forsenda þátttöku.

Jafnrétti er stutt með því að áfanginn er opinn öllum og lögð er áhersla á að allir nemendur fái tækifæri til að þroska tæknilega hæfni sína, óháð fyrri reynslu eða bakgrunni – mikilvægt í faggrein sem hefur verið kynbundin.