STÆR1AR05 - Stærðfræði - Algebra og rúmmál

Undanfari : Áfanginn er ætlaður nemendum sem koma upp úr grunnskóla með hæfnieinkunn C+
Í boði : Alltaf

Lýsing

Meginviðfangsefni áfangans eru: Grunnhugtök í mengjafræði, upprifjun á talnameðferð, röð aðgerða, frumþáttun talna og almennum brotum. Undirstöðuatriði í algebru, liðun og þáttun og einföldun algebrubrota. Jöfnureikningur og lausn jöfnuhneppa. Prósentu- og vaxtareikningur. Rúmfræðireikningur, flatarmál, rúmmál, Pýþagórasarreglan, einslögun þríhyrninga og horn við hring. Hnitakerfið og jafna beinnar línu

Nemandi skal hafa öðlast þekkingu og skilning á:

  • talnameðferð og frumtölum
  • almennum brotum og tugabrotum
  • heiltöluveldum
  • prósentu-, hlutfalla- og vaxtareikning
  • undirstöðuatriðum í algebru, fyrsta stigs jöfnum og lausn jöfnuhneppa
  • flatarmáli og rúmmáli algengra forma
  • jöfnu beinnar línu og hnitarúmfræði í tvívíðum fleti

Nemandi skal hafa öðlast leikni í að:

  • beita helstu aðgerðum á heilar tölur og brot og nota víxlreglu, tengireglu og dreifireglu í talnareikningi
  • beita veldareglunum og reglum sem gilda um röð aðgerða
  • reikna prósentur og vexti
  • beita undirstöðureglum algebru, s.s. liðun og þáttun, við lausn á jöfnum
  • vinna með jöfnu beinnar línu, finna hallatölu og skurðpunkta við ása hnitakerfisins
  • reikna flatarmál og rúmmál algengra forma
  • reikna hornaföll í rétthyrndum þríhyrningum
  • vinna með Pýþagórasarreglu og reglur um einslögun þríhyrninga
  • beita reglum um horn við hring
  • tjá sig munnlega og skriflega á stærðfræðilegan hátt

Nemandi skal geta hagnýtt þá almennu þekkingu og leikni sem hann hefur aflað sér til að:

  • skrá lausnir sínar skipulega, skiptast á skoðunum við aðra um þær og útskýra hugmyndir sínar og verk skilmerkilega á viðeigandi hátt
  • átta sig á tengslum ólíkra aðferða við framsetningu stærðfræðilegra hugmynda og viðfangsefna
  • skilja merkingu og tengsl hugtaka í námsefninu og vinna með þau
  • fylgja og skilja röksemdir og röksamhengi í mæltu máli og texta
  • beita skipulegum aðferðum við að leysa úr viðfangsefnum og þrautum, s.s. út frá þekkingu á lausnum svipaðra þrauta
  • vinna til baka frá þekktum stærðum eða með því að setja upp jöfnur
  • takast á við stærðfræðileg verkefni með opnum og jákvæðum huga

Grunnfærni menntunar

Í stærðfræðikennslu fléttast grunnþættirnir saman á margvíslegan hátt:

  • Læsi er hornsteinn námsins. Nemendur þjálfast í að lesa úr tölulegum gögnum, túlka niðurstöður og miðla lausnum á skýran og skipulegan hátt, en þetta tölulæsi er grunnfærni sem allir þurfa í nútímasamfélagi.
  • Sköpun á sér stað þegar nemendur glíma við opin verkefni, þurfa að velja á milli aðferða og leita að eigin lausnarferlum. Þar er gert ráð fyrir að mistök séu hluti af námsferlinu og nemendur hvattir til þess að nota gagnrýna hugsun.
  • Sjálfbærni kemur fram þegar stærðfræðilegri hugsun er beitt á raunveruleg viðfangsefni sem gefur nemendum tækifæri til að skilja hvernig stærðfræðin tengist ábyrgð þeirra gagnvart samfélagi og umhverfi.
  • Jafnrétti endurspeglast í kennsluháttum sem tryggja að allir nemendur, óháð bakgrunni eða reynslu, fái tækifæri til að njóta styrkleika sinna og uppgötva eigin samband við námsgreinina.