Lög Nemendafélags öldungadeildar Fjölbrautaskóla Suðurnesja

1. gr.
Nafn félagsins er Öldungadeild Fjölbrautaskóla Suðurnesja og er það nemendafélag öldungadeildar Fjölbrautaskóla Suðurnesja. Heimili þess og varnarþing er í Keflavík.

2. gr.
Tilgangur er að vinna að vexti og viðgangi félagslífs öldunga og kynningu þeirra innbyrðis og gæta hagsmuna þeirra sem nemenda. Stjórn félagsins, öldungaráð, er fulltrúi og tengiliður öldungadeildar FS gagnvart skólayfirvöldum, stjórnvöldum, Nemendafélagi FS og aðilum utan skólans.

3. gr.
Nemendur verða félagar Öldungadeildar FS við innritun í skólann og fá þá afhent lög félagsins.

4. gr.
Æðsta vald félagsins er í höndum aðalfundar. Aðalfundur skal haldinn á haustönn og ekki síðar en í áttundu viku skólahalds. Á vorönn skal haldinn félagsfundur í áttundu viku skólahalds og fari þar fram kosningar ef með þarf. Boðað skal til aðalfundar á áberandi hátt á öldungatöflu með minnst einnar viku fyrirvara. Aðalfundur telst löglegur sé löglega til hans boðað.
Dagskrá aðalfundar:
1. Skipaður fundarstjóri og fundarritari.
2. Skýrsla stjórnar um störf félagsins á liðnu ári.
3. Endurskoðaðir reikningar félagsins lagðir fram til samþykktar.
4. Ákvörðun félagsgjalda.
5. Kjör öldungaráðs.
6. Kjörnir verða tveir endurskoðendur, annar úr hópi kennara.
7. Lagabreytingar.
8. Önnur mál.
Einfaldur meirihluti ræður um kjör og tillögur.

5. gr.
Öldungaráð fer með stjórn félagsins milli aðalfunda og sér um daglegan rekstur þess. Í öldungaráði sitja fjórir aðilar. Formaður kosinn sérstaklega en að öðru leyti skiptir ráðið sjálft með sér verkum. Ráðið skal hafa fastan fundartíma, einu sinni í mánuði eða oftar. Formaður situr í ráðinu lengst tvö ár í senn. Sé um forföll að ræða í öldungaráði er heimilt að skipa í stöðuna fram að næstu kosningum. Öldungaráð getur falið einstökum félagsmönnum að inna af hendi störf í þágu félagsins og einnig skipa sérstakar nefndir í sama tilgangi. Aldrei skulu fleiri en tveir ganga úr stjórn í einu.

6. gr.
Öldungaráð skal sjá um að nemendur njóti góðs af félagsgjöldum yfirstandandi annar.

7. gr.
Ef starf Nemendafélags öldungadeildar FS af einhverjum ástæðum fellur niður um tíma eru eignir félagsins í vörslu skólameistara FS sem einnig getur haft frumkvæði að því að haldinn sé aðalfundur ef öldungaráð starfar ekki samkvæmt gildandi lögum félagsins.

8. gr.
Lög þessi öðlast gildi frá og með 20. október 1994, jafnframt eru eldri lög frá 21. nóvember 1989 fallin úr gildi.

Til baka, Senda grein, Prenta greinina