Fréttir
Þemaverkefni í háriðnum
Nemendur Hársnyrtideildar hafa á önninni unnið þemaverkefni sem samþætt var í tveimur áföngum, iðnfræði (IFH 203) og iðnteikningu (ITH 203) en það eru kennararnir Ásdís Björk Pálmadóttir og Íris Jónsdóttir sem halda þar um stjórnvölinn. Nemendur skiptu sér í 3ja manna hópa og síðan fékk hver hópur verkefni til að vinna með en þau voru Stríðsárin, Rómaveldi, Hippatímabilið og Pönkið. Nemendur fengu nokkuð frjálsar hendur og fjölluðu ekki eingöngu um hártísku tímabilsins heldur einnig förðun, fatnað, byggingarstíl, húsgögn og raunar allt það sem nemendum datt í hug.
Nemendur kynntu síðan verkefnin fimmtudaginn 17. mars. Hóparnir höfðu útbúið bækur og plaköt með upplýsingum um sitt tímabil og lögðu ekki síður mikið upp úr kynningunni sjálfri þar sem sumir hóparnir klæddu sig upp og förðuðu samkvæmt tísku tímabilsins. Eins og sjá má á meðfylgjandi myndum lögðu nemendur mikinn metnað í verkefni sín og úr varð stórskemmtileg kennslustund þar sem nemendur og ekki síður kennararnir lærðu margt nýtt.
