Fréttir
Evrópusamstarf um leiðir til að draga úr brottfalli
Á dögunum hittust kennarar frá skólum í sex Evrópulöndum í skólanum en þá fór fram fyrsti fundur hóps sem vinnur að verkefni á vegum Leonardo-áætlunarinnar. Verkefnið er til tveggja ára og er ætlunin að skoða leiðir til að minnka brottfall í framhaldsskólum. Markmiðið er að taka saman yfirlit yfir kennsluaðferðir og námsefni sem hefur virkað vel til þess að draga úr brottfalli nemenda og einnig á að koma á tengslum milli skóla og stofnana sem eru að þróa aðferðir til að minnka brottfall.
Skólinn er aukaaðili að verkefninu; kennarar frá skólanum taka þátt í fundum á Íslandi og fá aðgang að öllum gögnum hópsins. Kennarar frá skólunum sem taka þátt í verkefninu hittust fyrst á Íslandi og héldu fundi hér og í Tækniskólanum í Reykjavík. Fundina sóttu þrír kennarar frá Íslandi og Tyrklandi og tveir kennarar frá Belgíu, Finnlandi, Frakklandi og Skotlandi.
